Hè ghjunta a sera di Ghjovi Santu. In a Casalta s’aspetta è si tende l’arechja. À mumenti si sentenu i canti di Silvareccinchi ch’affaccanu in prucessione sin’à in piazza. Ci vole à esse pronti, vestuti, à falli l’accolta. Ci vole à insumà u portacroce cun quellu crucifissu tamantu è pisivu.
In i tempi, era ancu più grande, più altu, più diffìciule à manuvrà. Ma per via di u perìculu, l’anu ammuzzatu à u pede d’una vintina di centìmetri. Purtà u crucifissu era un’onore, una fiertà, chì omu a si trasmettia da babbu à figliolu, fintantu chì a permettìanu l’età è a salute ...
Ghjunti sò Silvareccinchi. Casaltacci si sò disposti in tagliu di strada, in òrdine di prucessione è i lascianu passà. Poi piglianu a fila anch’elli. Dopu parechji giri ch’ellu s’hè furmatu u chjerchju in piazza, u capu d’asta attacca a Granìtula. Piglia è trinca ver’di u centru furmendu à pocu à pocu quellu vocatondu chì s’imbucineghja sempre è sempre, strittisce, strittisce, fin’à u puntu stremu. Hè tuttu compiu. A vita n’hè ghjunta à tèrmine, u mondu ùn hè più. A sola pussibulità ghjè a rinàscita.
Tandu u capu d’asta si volta è mette à girà à contrasensu. È pianu pianu si sbucineghja tuttu, è po s’allarga, s’allarga è po volta chjerchju tondu, chjosu, perfettu.
Hè tempu à entre in chjesa, tutti tutti, à ramintassi a Passione di Cristu, à mette canti, parolle è preghere nant’à sta magia.
Torna una volta hè accadutu u miràculu di a morte è di a rinàscita. Torna una volta in un paisucciu di Castagniccia, sò stati ripetuti quelli gesti seculari chì facenu chì u mondu hè salvu ...
